Die eerste uitgawe van Kook en geniet is die eerste keer in 1951 gepubliseer. Meer as 'n miljoen eksemplare later het dit homself stewig gevestig as 'n Suid-Afrikaanse klassieke en een van die gewildste plaaslike kookkunstitels ooit.

In 2009 is dit hersien, opgedateer en heeltemal herontwerp om sy oorspronklike kleiner en dikker formaat te eggo. Hierdie huidige uitgawe kombineer 'n leesbare, moderne gevoel met die klassieke voorkoms van die oorspronklike.

Net so onontbeerlik vir die gesoute kok as vir die beginner, bevat dit alles wat jy oor kook moet weet – van die afmeet van bestanddele en die gebruik van oonde tot die voorbereiding van groente en vleis of hoe om kos te vries – saam met meer as 700 resepte, spesiaal gekies en getoets – van ontbyt tot mengeldrankies. ’n Groot aantal van die disse is geliefde Suid-Afrikaanse gunstelinge.